Jérôme PLEUMECOQ dins :
L'Z'ÉPISTOLES KAIMBERLOTTES
d'Henri CARION

8^e épistole [1]                                                 Le 4 décembre.        

L’ 4 eud’ Déchaimbe.

   Y a à ch’t’heure pus d’tros s’moines, no maîte, j’avo été à mon ch’cousin Flippe, pou li rinte s’visite que j’vos ai acontée. Ch’é bon : v’là que j’buque [2] à s’n’huis [3], aine fos, deux fos, tros fos : bah ! ouaite ! chel porte alle m’fait toudi visaige d’blainc bos. Pou lors, j’saque [4] ch’loquet mi-même et m’v’là dains chel salle. Queu ch’é que j’reluque [5] ? Ch’ cousin Flippe kil éto quasimaint kéu ain chincope. – A ch’t’heure ! que j’li dis, ch’cousin, que qu’ch’é qu’vos avêtes à traner [6] ainsain les fieffes ? – Ah ! ch’cousin, ki m’répond, vétiez chou kil est marqué d’zu chel feuille ! Nos l’avote’ aincore ain cop récapé biel ! – I volo parler ch’l’homme d’chel cospiration de ch’tiau Louis Bonaparte kil a assayé d’faire comme ch’graind. – Ch’é vrai poucha, que j’li dis à ch’cousin Flippe : aincore aine mioche no pove magister Chrisostôme Magnificat i n’aro pu eu à kainter sain domine salvum fac regeme nostrum ludovicum philippum qu’cha l’a quasimaint étrané [7] à forche qu’ch’é long et méchaint à kainter. – Chéti point ain sort, « ki bougonne ch’cousin Flippe : « i n’a mi pu ain ki joque [8] à s’plache ! drochi [9] n’ain v’là ki kaintent vive Napoléon II ! drolà [10], v’là l’z’autes ki gueulent : vive l’république : et chés brave’é geains i n’peuvent mi pus faire aine goutte d’bon saing ! – Ch’est jusse ! ch’cousin, que j’li ramoutre, vos avêtes déloïé [11] ch’taur [12] ; quaind qu’vos li arez r’abouclé sain loïen, i s’fra pu tard ki n’é. – Bah ! ki m’fait ain r’chignaint : vos êtes toudi après chel révolution d’Julète. Ejou [13] s’faute si qu’nos véons chou ki s’trifouille. – Ch’cousin, que j’li dis, acoutez aine tiaute histoire : vos connossez ben ch’l’arbe à prônes kil é au mitain de ch’courti [14] tiau-Ri ? – Asseuré [15], qu’je l’conno. – Vos vos ramentuvez [16] ben chés bielle’é prônes ki-z-étotent d’zeur, après l’Août. – Awi !

Suffit : ché tiaux galmites [1] d’no aindro i-z-ont caché [2] à l’z’esbiner [3]. Les v’là ainforchés, par nuit, à l’aintour de ch’l’arbe à prônes. Chés pus grainds et ché pus malins i grimpent alle courte ékielle d’zu l’dos d’leus comarades, et aine fo inkrainqués [4] d’zu chés brainques, i qu’mainchent à mier des prônes tertout leu sou.

     Pou lors, chés pus tiaus ki r’luquotent [5] ain bas de ch’l’arbe, i qu’mainchent à houper [6] : mi ain n’arai jou aine ! mi ain n’arai jou eine ! » Et pis eu l’z’évlà ki s’attiquent [7] à ch’prônier, ain saquaint [8] ch’pov’arbe, kils l’allotent ruer à tierre. Hureusemaint ch’maite il accuert [9] aveuc aine gaule : i buque [10] taint kil a d’forches d’zu tertous chés galmites, et i vos les fait vidier [11] déhors d’sain courti. – Copernez-vous ch’cousin Flippe ? – Awi ! awi ! ch’Fissiau, » ki m’dit ain s’ dégrattaint [12] s’n’oreille, « vo feintiche [13] alle est cousute d’blainc filet. Ejou qu’vos créez que j’n’avise point chou qu’vos volez conter aveuc vo n’arbe à prônes ? ch’est ch’governemaint qu’vos volez dire, hémon [14] – cha podro [15] ben s’faire.

           – Vos galmites qui mieutent chés prônes, cha n’nos moutre-ti point chés tortrinaires [16] ki-z-ont eu l’fil [17] d’agripper ché plaches ? – Vos avez tout d’même bouté l’nez d’zeur, ch’cousin Flippe. – Et chés pus tiaus ki-z-ont fait l’courte ékielle à leus comarades et ki-z-houpent, ain aguettaint ain bas de ch’l’arbe à prônes : « mi ain’ n’arai-jou aine ! » cha m’a fameusemaint [18] l’air de r’sanner [19] à ché-z-héros d’julète kain les a r’merchiés après chés barricades, et ki cachent à r’qu’maincher leu giu. – Cha y é ch’cousin ! – Et ch’ maîte kil accuert les ruer tertous ain bas aveuc s’gaule, ch’étot-i point… –  Vétiez   à vo laingue, ch’cousin que j’li crie, ain li fremaint s’bouque ; chés juches eud’Doué i vos acoutent. Et j’vos prie l’bonsoir : car mi j’ai pus quierre [20] à m’rainaller [21] couquier dains main lit qu’ain gaïole.